મ્યુચ્યુઅલ ફંડ તરફ રોકાણકારોનો પ્રવાહ વધ્યો, ફેબ્રુઆરીમાં SIP ઇનફ્લો રૂપિયા 19000 કરોડને પાર પહોંચ્યો

સિસ્ટમેટિક ઇન્વેસ્ટમેન્ટ પ્લાન એટલેકે SIP ઇન્ફ્લો ફેબ્રુઆરી 2024માં સર્વોચ્ચ સ્તરે પહોંચી ગયો છે જે પ્રથમ વખત રૂપિયા 19,000 કરોડના આંકને વટાવી ગયો છે. ડેટા દર્શાવે છે કે SIP ઈનફ્લો રૂપિયા 19,187 કરોડ હતો જે અગાઉના મહિનામાં રૂપિયા 18,838 કરોડથી નોંધપાત્ર વધારો દર્શાવે છે.

આ દર્શાવે છે કે SIPમાં રોકાણકારોનો વિશ્વાસ વધી રહ્યો છે. નાણાકીય નિષ્ણાતો SIP ના પ્રવાહમાં આ ઉછાળાનું શ્રેય ઘણા પરિબળોને આપે છે જેમાં લાંબા ગાળાની સંપત્તિ સર્જન વિશે જાગૃતિ, SIP દ્વારા રોકાણ કરવામાં સરળતા અને બજારની એકંદર સકારાત્મક ભાવનાનો સમાવેશ થાય છે.મ્યુચ્યુઅલ ફંડ હાઉસ પણ અનુભવી રોકાણકારો અને બજારમાં નવા પ્રવેશ કરનારા બંને માટે સુલભ અને શિસ્તબદ્ધ રોકાણ વિકલ્પ તરીકે SIP ને સક્રિયપણે પ્રોત્સાહન આપી રહ્યા છે.

રિટેલ રોકાણકારોનો SIPમાં વિશ્વાસ કેમ વધી રહ્યો છે?

બજારના નિષ્ણાતોના મતે રોકાણકારોમાં SIP રોકાણમાં વિશ્વાસ વધવાનું કારણ બજારના અનેક પરિબળો છે. નિષ્ણાતો માને છે કે લોકો હવે લાંબા ગાળામાં મોટી મૂડી બનાવવા વિશે વિચારી રહ્યા છે.

SIPમાં સરળ રોકાણ પણ રોકાણકારોના રસનું કારણ બની શકે છે. તે જ સમયે, SIP અંગે સકારાત્મક ભાવના પણ હાલમાં એક કારણ છે. આ ઉપરાંત એવું પણ જોવા મળ્યું છે કે મ્યુચ્યુઅલ ફંડ હાઉસ પણ SIP રોકાણને પ્રોત્સાહન આપી રહ્યા છે. જેના કારણે રિટેલ રોકાણકારોમાં SIP રોકાણમાં રસ વધી રહ્યો હોવાનું જણાય છે.

રોકાણનો પ્રવાહ સતત વધી રહ્યો છે

જો આપણે આંકડાઓ પર નજર કરીએ તો, ફેબ્રુઆરી એ સતત 36મો મહિનો છે જ્યારે ઇક્વિટી પ્રવાહ જોવા મળ્યો છે. એટલે કે SIP રોકાણ સતત વધી રહ્યું છે. AMFI ડેટા દર્શાવે છે કે ફેબ્રુઆરીમાં ઇક્વિટીનો પ્રવાહ વધીને ₹26,703.06 કરોડ થયો છે. જ્યારે જાન્યુઆરી મહિનામાં તે ₹21,749ના સ્તરે હતો.

ઇક્વિટી મ્યુચ્યુઅલ ફંડ 23 મહિનાની ઊંચી સપાટીએ પહોંચ્યું

ઇક્વિટી મ્યુચ્યુઅલ ફંડ્સે ફેબ્રુઆરીમાં રૂ. 26,866 કરોડના પ્રવાહ સાથે તેમનો વધારો ચાલુ રાખ્યો હતો, જે છેલ્લા 23 મહિનામાં સૌથી વધુ માસિક પ્રવાહ છે. સેક્ટર-આધારિત ફંડ્સ અને નવા ફંડ ઑફર્સ (NFOs)માં મોટા પાયે રસને કારણે ઇક્વિટી મ્યુચ્યુઅલ ફંડ રોકાણમાં વધારો થયો છે. ઈક્વિટી મ્યુચ્યુઅલ ફંડમાં ફેબ્રુઆરીના રોકાણનો આંકડો જાન્યુઆરીના રૂ. 21,780 કરોડના રોકાણ કરતાં લગભગ 23 ટકા વધુ છે.